मालवाहतुकीसाठी तिसरी साइडिंग दौलताबादला
Maharashtra Times | Updated Nov 15, 2017, 03:00 AM IST
AAA
म. टा. प्रतिनिधी, औरंगाबाद
दौलताबाद रेल्वे स्टेशनवरून मालवाहतूक करण्यासाठी उद्योजकांच्या मागणीनुसार तिसरी साइडिंग टाकण्यात येत आहे. या साइडिंगवरून मालाची थेट...
more... वाहतूक करता येणार आहे.
रेल्वेद्वारे मालवाहतूक वाढावी यासाठी रेल्वे विभाग विविध प्रयत्न करत आहे. मालवाहतुकीसाठी विशेष कॉरिडोर तयार करण्याचे काम सुरू आहे. औरंगाबाद शहरातील विविध उद्योगांत तयार होणारा माल रेल्वेव्दारे पुरवठा करण्यासाठी दौलताबाद येथे कंटेनर डेपोची उभारणी करण्यात आली आहे. येथून एका आठवड्यात दोन दिवस मालवाहतूक केली जाते. याशिवाय लष्कराच्या माल वाहतुकीसाठी विशेष साइडिंग करण्यात आली आहे.
दौलताबाद स्टेशनवरील या दोन साइडिंगनंतर तिसरी साइडिंग तयार करण्याचे काम सुरू आहे. शहरातील लक्ष्मी इंटरप्राईजेस या निर्यातदार एजन्सीने तिसरी साइडिंग तयार करण्याची मागणी केली होती. ही साइडिंग तयार झाल्यानंतर येथे उद्योजकांना जागा उपलब्ध होणार आहे.
व्हिडिओकॉन साइडिंग बंद
औरंगाबाद रेल्वे स्टेशनच्या नवीन इमारतीशेजारी व्हिडिओकॉन कंपनीसाठी साइडिंग तयार करण्यात आली होती. त्या वरून एकदाच मालवाहतूक करण्यात आली. ही साइडिंग अनेक वर्षांपासून उपयोगात नाही. ती बंद करून इतर मालवाहतुकीसाठी तिचा वापर करण्याचा निर्णय रेल्वेने घेतला आहे, अशी माहिती सूत्रांनी दिली.
साइडिंग म्हणजे काय
रेल्वेच्या डब्यात उत्पादने भरण्यासाठी रूळ टाकून प्लॅटफॉर्म बांधला जातो. येथे माल भरण्यासाठी सर्व प्रकारची व्यवस्था केली जाते. याला साइडिंग म्हणतात.