ఈ ప్రతిపాదనను రైల్వే వారి దృష్టికి తీసుకువెళదాం అని అనుకుంటున్నాను!
నమస్కారం!
గుంటూరు రైల్వే డివిజన్ అభివృద్ధి కోసం ప్రజల తరపున మీరు చేస్తున్న కృషి అభినందనీయం. ఈ క్రమంలో మన గుంటూరు నగరపు రైల్వే అభివృద్ధి కోసం నేను ఒక ప్రతిపాదన చేయదలచాను.
ప్రతిపాదన: న్యూ గుంటూరు రైల్వే స్టేషన్ కు బదులుగా నంబూరు రైల్వే స్టేషన్ ను అభివృద్ధి చేయుట.
ప్రయోజనం:...
more...
విజయవాడ - గూడూరు మార్గంలో నడిచే కొన్ని రైళ్ళను గుంటూరు నగరం మీదుగా మళ్ళించుట కొరకు న్యూ గుంటూరు రైల్వే స్టేషన్ ఏర్పాటు చేయబడిన విషయం విదితమే. ఈ స్టేషన్ ఏర్పాటు చేయుటకు ఎంతో కృషి చేసిన విషయం వాస్తవం. స్టేషన్ ఏర్పాటుతో పాటు రైళ్ళ మళ్ళింపు చేసినందుకు రైల్వే శాఖకు గుంటూరు నగరం ఎప్పటికీ ఋణపడి ఉంటుంది. అయితే, ఈ స్టేషన్ విషయంలో అనేక ఇబ్బందులు ఉన్నాయి. అవి
1. ప్రధాన సమస్య: ఈ రైల్వే స్టేషన్ గుంటూరు జంక్షన్ రైల్వే స్టేషన్ యొక్క బైపాస్ లైన్ మీద ఉంది. స్టేషన్ కు చేరుకోవడానికి ఒక మెయిన్ రోడ్ కూడా లేదు సరికదా, ఒక కొత్త రోడ్ ఏర్పాటు చేసుకునే చోటు కూడా లేదు. నగరవాసులు రైల్వే స్టేషన్ కు రావాలంటే చిన్న చిన్న సందుల లోంచి రావాల్సిన దుఃస్థితి!
2. ప్రజా రవాణా: న్యూ గుంటూరు రైల్వే స్టేషన్ కు ప్రజా రవాణా సౌకర్యాలు లేవు. గుంటూరు జంక్షన్ రైల్వే స్టేషన్ కు నెం. 23 ప్రైవేట్ సిటీ బస్ వెళ్తుంది. ఇంకా అనేకమంది శంకర విలాస్ సెంటర్ నుండి నడుచుకుంటూ వెళతారు. కానీ, న్యూ గుంటూరు రైల్వే స్టేషన్ కు అటువంటి సౌకర్యం ఏమీ లేదు. కనీసం లోకల్ రైళ్ళు కూడా రాని స్టేషన్ అది. ఫలితంగా ఆటో డ్రైవర్లు ఇష్టానుసారంగా చార్జీలు వసూలు చేస్తూ, అడిగితే రైల్వే గేట్లు, ఇతర ఇబ్బందులు చెబుతున్నారు. కనీసం ఎన్టీఆర్ బస్టాండ్ నుండి కూడా స్టేషన్ కు చేరుకోలేని పరిస్థితి ఉంది!
3. రైల్వే స్టేషన్ లో త్రాగు నీరు వంటి వాటి కొరత. ఉన్నది ఒక్కటే ప్లాట్ఫారం. వంపు తిరిగి ఉన్న లైన్ మీద రైలు ఆగి, బయల్దేరటానికి ఎక్కువ సమయమే తీసుకుంటోంది.
ఫలితంగా కేవలం ఆరు రైళ్ళతో ఈ స్టేషన్ నిరుపయోగకరంగా ఉంది. మరిన్ని రైళ్ళు, మరిన్ని ప్లాట్ఫారాలు ఏర్పాటు చేసినా స్టేషన్ కు చేరుకోవడమే ఎప్పటికీ తీరని సమస్యగా ఉండిపోనుంది. పైగా ఇటువంటి చోట స్టేషన్ పెద్దదైతే ఉన్న రోడ్ వసతులు వంటివి సరిపోక ఇబ్బందులు ఎక్కువవుతాయి.
అదే నంబూరు రైల్వే స్టేషన్ విషయానికి వస్తే.
1. రైల్వే స్టేషన్ విజయవాడ - గుంటూరు హైవే పక్కనే ఉంది. 500 మీటర్ల పొడవున్న ప్లాట్ఫారాలు ఇప్పటికే రెండు ఉన్నాయి. కావలసి వస్తే కట్టుకోవటానికి మధ్యలో ఇంకో రెండు ప్లాట్ఫారాలు ఉన్నాయి. గుంటూరు జంక్షన్ కి కేవలం 9 కిలోమీటర్ల దూరంలో ఉంది ఈ స్టేషన్. ఇప్పటికే అనేక లోకల్ రైళ్ళు, పాసెంజర్ రైళ్ళు ఇక్కడ ఆగుతున్నాయి. కాబట్టి గుంటూరు జంక్షన్ నుండి చేరుకోవడం తేలిక.
2. ప్రజా రవాణా పుష్కలంగా ఉంది. విజయవాడ, గుంటూరు, మంగళగిరి, సచివాలయం రూట్లలో నడిచే తెలుగు వెలుగు బస్సులతో పాటు, గుంటూరు పాత బస్టాండ్ నుండి కంతేరు మీదుగా తాడికొండకు నడిచే నెం. 5, నంబూరుకు నడిచే నెం. 6 రూట్లలో ప్రైవేట్ బస్సులు విరివిగా ఉన్నాయి. అవసరమైతే నెం. 15ను ఆటోనగర్ మీదుగా, నెం..27ను నందివెలుగు రోడ్ మీదుగా నంబూరు స్టేషన్ వరకూ పొడిగించవచ్చు. ఇవి కాక విజయవాడ, గుంటూరు స్టేషన్లకు నడిచే పాసెంజర్ రైళ్ళు ఉన్నాయి.
3. రైల్వే స్టేషన్ స్ట్రెయిట్ లైన్ మీద ఉండుట వలన రైలు ఆగి, బయలుదేరుట చాలా తేలిక. అదే న్యూ గుంటూరు స్టేషన్ అయితే రైలు వంపు ఉన్న లైన్ మీద ఆగి మళ్ళీ బయలుదేరాలి. ఉన్న రెండు ప్లాట్ఫారాలు చాలు అనుకుంటే ఇక కొత్తగా రైల్వే స్టేషన్ కట్టనవసరం లేదు. మంగళగిరి స్టేషన్ లో కూడా రైళ్ళకు హాల్ట్ ఇవ్వాలని అభ్యర్థనలు ఉన్నాయి. అప్పుడు గుంటూరు జంక్షన్ మీదుగా వెళ్ళే రైళ్ళకు మంగళగిరిలో, అలాగే న్యూ గుంటూరు మీదుగా తెనాలి వెళ్ళే రైళ్ళకు నంబూరు రైల్వే స్టేషన్ లో హాల్ట్ ఇవ్వవచ్చు. ఇది నంబూరు వైపు ఇప్పటికే పెదకాకాని దాటి వచ్చేసిన గుంటూరు నగర విస్తరణకు దోహదపడుతుంది.
4. ప్రస్తుతం న్యూ గుంటూరు స్టేషన్ ను పూర్తిగా తొలగించి, దాని స్థానంలో గుంటూరు బైపాస్ లైన్ ను డబల్ లైన్ చేయవచ్చు. తద్వారా తెనాలి వైపు వెళ్ళే రైళ్ళు వేగంగా వెళ్ళిపోవచ్చు.
ఇంతకంటే పెదకాకాని రైల్వే స్టేషన్ దగ్గరే అయినా, ఆ స్టేషన్ ను కూడా చేరుకోవడం కొద్దిగా ఇబ్బందికరమైన విషయమే. పాత గుంటూరు లేదా మణిపురం క్రాసింగ్ వద్ద స్టేషన్ కట్టవచ్చు గానీ అవి లోకల్ స్టేషన్స్ గా తప్ప మెయిన్ స్టేషన్స్ గా పనికిరావు. కారణం చిన్న రహదారులే. పైగా కొత్త స్టేషన్ కట్టడం అంటే ఎంత పని అనేది నేను మీకు వేరే చెప్పనవసరం లేదు.
కావున నాయందు దయయుంచి ఈ ప్రతిపాదనను రైల్వే అధికారుల దృష్టికి తీసుకువెళ్ళవలసినదిగా సవినమ్రతతో ఆర్థిస్తున్నాను!
ఇట్లు,
మనోహర్ ఈమని.